DKT SAMIA AMPONGEZA RAIS WA AfDB, AKINWUMI ADESINA
NIGERIA
Rais wa Jamhuri ya Muungano wa Tanzania Mhe. Samia Suluhu Hassan amepongeza mchango mkubwa wa Rais wa Kundi la Benki ya Maendeleo ya Afrika (AfDB) Akinwumi Adesina, katika kuendeleza miradi muhimu ya kimkakati ya Tanzania.
Katika hotuba yake aliyoitoa wakati wa hafla ya utoaji wa Tuzo ya Uongozi ya Obafemi Awolowo mjini Lagos, Nigeria (jana) Machi 6, Rais Samia amesema Tanzania ni mojawapo ya mataifa ya Afrika yanayonufaika sana na uongozi mahiri wa Dkt Adesina.
"Shukrani kwa uwezo wake wa ajabu wa kufanya kazi na watu katika sekta mbalimbali katika kipindi cha miaka minane iliyopita," Amesema Dkt Samia.
Mh Dkt Samia amepongeza uwekezaji mkubwa wa AfDB chini ya usimamizi wa Dkt Adesina katika nishati, uchukuzi, kilimo, maji na usafi wa mazingira, na miundombinu kwa uunganisho wa kikanda hususan katika kupata msaada wa kifedha kwa mradi mkubwa wa Reli ya Standard Gauge wa Tanzania (SGR), unaolenga kuunganisha Tanzania na Jamhuri ya Kidemokrasia ya Kongo (DRC) na Burundi.
“Hii inazingatia Ajenda ya Afrika 2063, ambayo inatetea muunganisho wa kiuchumi na muunganisho wa watu ili kuhakikisha usafirishaji huru wa bidhaa na huduma katika kanda,” Ameongeza Dkt Samia.
Rais Samia alimuelezea Dkt Adesina kama kiongozi mwenye maono na dhamira isiyoyumba katika maendeleo ya Afrika na akapongeza utetezi wake wa dhati wa kilimo na juhudi za kuhakikisha usalama wa chakula katika bara zima ambapo mwaka 2023 aliitisha Mkutano wa Feed Africa wa 2023 ambao uliwaleta pamoja viongozi kushughulikia changamoto za usalama wa chakula.
Aidha Mhe Rais Samia kupitia hadhara hiyo amesisitiza dhamira ya Tanzania ya kushirikiana na AfDB katika kufanikisha miradi ya kuleta mabadiliko kwa manufaa ya WaTanzania na bara zima la Afrika.
KUMBUKA:- Miradi mingine inayofadhiliwa na AfDB nchini Tanzania ni pamoja na Kituo cha Ubora wa Sayansi ya Moyo na Mishipa, Mradi wa Barabara ya Nje ya Jiji la Dodoma, Mbinu ya Ufadhili wa Mbolea Afrika (AFFM) na ujenzi wa Uwanja wa Ndege wa Kimataifa wa Msalato mjini Dodoma.
