DKT SAMIA KUKUTANA NA WAMASAI, WADAU  WAMPONGEZA

ARUSHA

Mhe Rais Dkt Samia Suluhu Hassan ametangaza kuunda tume mbili za kushughulikia masuala ya eneo la Ngorongoro Mkoani Arusha, hatua ambayo imewaibua wadau na watetezi wa haki za binadamu kuzungumza huku wakimpongeza kwa hatua hiyo muhimu kwa mustakabali wa nchi na wananchi wa eneo hilo.

Katika tume hizo 2, tume moja itachunguza malalamiko kuhusu masuala ya ardhi yaliyotolewa na wakazi wa Ngorongoro, huku nyingine ikifanya tathmini ya utekelezaji wa uhamiaji wa hiari kutoka Hifadhi ya Ngorongoro.

Mhe Rais Samia alitaja uamuzi wa serikali  wakati wa kikao na viongozi wa kabila la Wamasai kutoka Ngorongoro ambao ulifanyika katika ukumbi wa State Lodge mkoani Arusha Desemba Mosi 2024.

Kikao hicho ulilenga kuwasikiliza viongozi wa makabila na kujibu kero zao kuhusu baadhi ya maamuzi ya serikali yanayohusu eneo la Ngorongoro.

Rais  Dkt Samia amewahakikishia viongozi hao kuwa serikali inaendelea na dhamira ya dhati ya kuimarisha utendaji kazi wa Mamlaka ya Hifadhi ya Eneo la Ngorongoro (NCAA) ili kudumisha uhusiano mzuri kati ya serikali na wakazi.

Pia amesisitiza haja ya ushirikiano mkubwa wa wananchi katika kupanga na kutekeleza miradi ya maendeleo ya ndani huku akiangazia umoja wa kitaifa wa Tanzania, akisisitiza uwajibikaji wa serikali kwa raia wake.

Katika kikao hicho, Mhe Rais ameiagiza Ofisi ya Rais, Tawala za Mikoa na Serikali za Mitaa (TAMISEMI) kushughulikia changamoto zilizopo katika eneo hilo, ikiwemo ukosefu wa huduma muhimu za kijamii.

BAADA YA KIKAO HICHO WADAU WANASEMAJE?

Mratibu wa Kitaifa wa Muungano wa Watetezi wa Haki za Binadamu Tanzania (THRDC), Onesmo Olengurumwa, amempongeza Mhe Rais Samia kwa mtazamo wake mzuri wa kukutana na viongozi wa jamii ya Wamasai.

“Tunamshukuru na kumpongeza Rais kwa kuchukua hatua ya kukutana na wakazi wa Ngorongoro na kutatua changamoto zao. Wakazi hao kwa muda mrefu wamekuwa wakitafuta hadhira kama hiyo na Rais. Inatia moyo kumuona akikutana nao ana kwa ana badala ya kutuma wawakilishi,” Bw Olengurumwa amesema.

Bw. Olengurumwa ameonesha matumaini kuwa uamuzi wa Rais utakuwa muhimu katika kutatua changamoto zao.

“Pia tunaunga mkono uamuzi wa kuunda tume ya kuchunguza na kumshauri Rais kuhusu masuluhisho endelevu ya eneo hilo. Hili limekuwa ombi letu kila wakati, hata wakati wa maingiliano yetu ya hapo awali na Rais. Nina imani kuwa tume inayopendekezwa itatumia mbinu shirikishi,” ameongeza.