UJENZI WA  EACOP WAFIKIA 47.1%

TANZANIA

Mradi wa Ujenzi  wa Bomba la Mafuta Ghafi la Afrika Mashariki (EACOP) umefikia asilimia 47.1, na hivyo kukaribia kuwa kiungo muhimu cha kusafirisha mafuta ya Uganda hadi katika masoko ya kimataifa kupitia Tanzania.

Utekelezaji wa mradi huo tayari umewanufaisha wananchi wa eneo hilo kupitia ajira za moja kwa moja na zisizo za moja kwa moja na shughuli nyingine zinazohusiana na kijamii na kiuchumi.

EACOP ni mradi wa kimkakati unaotekelezwa kwa ushirikiano wa serikali za Tanzania na Uganda pamoja na TotalEnergies na China National Offshore Oil Corporation (CNOOC).

Tanzania TPDC ina hisa asilimia 15, Uganda asilimia 15, TotalEnergies asilimia 62 na CNOOC asilimia 8.

Mradi huo ulianzishwa kutokana na ugunduzi wa hifadhi kubwa ya mafuta nchini Uganda inayokadiriwa kuwa karibu mapipa bilioni 6.5 ya mafuta ghafi.

Bomba hilo litasafirisha mafuta kutoka maeneo ya mafuta ya Uganda hadi bandari ya Tanga nchini Tanzania na kuwezesha usafirishaji wa mafuta ghafi katika masoko ya kimataifa.